نجم الابداع

نجم الابداع

استشارات هندسية ومقاولات عامة

ضع اعلانك هنا على منتديات نجم الأبداع // للتواصل والاستفسار الاتصال على الرقم التالى // 0508395662 ********* Image hosted by servimg.com
نسعى من أجل توفير كل الخدمات المتاحة لديناImage hosted by servimg.com التى لا غنا عنها فى الحياة العملية وهنا سوف نوفر لكم كل خدماتنا فى معظم المجالات الحرفية والصناعية والأعلانية وغيرها من الخدمات العامة نحن نتميز ونختلف عن الآخرون مع تحيات السيد رئيس مجلس أدارة المجموعة وأسرة منتديات نجم الأبداع ونتمنى لكم التوفيق والأستمتاع بقضاء أحلى الأوقات فى منتديات نجم الأبداع وأنتظرو منا المزيد لتلقى أستفساراتكم واقتراحتكم برجاء الأتصال بناعلى الأرقأم التالية متحرك //0508395662 متحرك آخر //0553366141 أو عبرالبريد الألكترونى//ngmelabdaa@gmail.com

    (¯`·._.·( رباعيات الاسطوره صلاح جاهين )·._.·`¯)

    شاطر

    أم عبدالله
    المشرف العام
    المشرف العام

    عدد الرسائل : 136
    العمر : 30
    نقاط : 2973
    تاريخ التسجيل : 17/02/2009

    (¯`·._.·( رباعيات الاسطوره صلاح جاهين )·._.·`¯)

    مُساهمة من طرف أم عبدالله في 19/2/2009, 12:46

    [ندعوك للتسجيل في المنتدى أو التعريف بنفسك لمعاينة هذه الصورة]

    [ندعوك للتسجيل في المنتدى أو التعريف بنفسك لمعاينة هذه الصورة]

    (¯`·._.·( رباعيات الاسطوره صلاح جاهين )·._.·`¯)





    لكل عشاق الاسطوره صلاح جاهين الموضوع ده ان شاء الله هيكون مخصص لطرح كل رباعيات واشعار صلاح جاهين وانا سوف اقوم بوضع المزيد منها ان شاء الله
    وكل الي يحب يضع جزء يتفضل مشكور


    بسم الله فلنبدأ

    ---------------



    وصف الجنة ... لــــــ / صلاح جاهين




    في الجنه...
    ابرق دهب
    و مخده من ريش النعام...
    تشرب سيادتك تنجعص اخر غرام
    ترفع عينيك تلاقي منجه مدلدله
    و فاكهه ياما متلتله..
    اصناف من اللي الكيلو مش عارف بكام
    منجه و فراوله و موز و تفاح يا وله
    وخوخ و برقوق م التمام...
    ياللعجب
    البرتقان ويا العنب
    في غصن واحد.. يا سلام
    جلا جلا يا محترم جلا جلا
    كل الامور متسهله.
    تطلب حواجب نمل والا قلوب دبب
    تحضر بسرعه مذهله
    ماعليكش الا بس تفضل تشتهي
    تطلب و تطلب في حاجات لا تنتهي
    كله يجاب
    ماهي جنه طبعا يا مهاب
    لكن مافيش غير بس شيء واحد وحيد
    لو تطلبه لا يستجاب..
    انك تعوز تخرج من السور الحديد

    [ندعوك للتسجيل في المنتدى أو التعريف بنفسك لمعاينة هذه الصورة]

    [ندعوك للتسجيل في المنتدى أو التعريف بنفسك لمعاينة هذه الصورة]
    رباعيات صلاح جاهين ,,, أشعار بالعامية المصرية


    [ندعوك للتسجيل في المنتدى أو التعريف بنفسك لمعاينة هذه الصورة]


    إليهم ...
    مع أن كل الخلق من أصل طين
    و كلهم بينزلوا مغمضين
    بعد الدقايق و الشهور و السنين
    تلاقى ناس أشرار و ناس طيبين
    عجبى !!


    عجبى عليك .. عجبى عليك يا زمن
    يا بو البدع يا مبكى عينى دما
    إزاى أنا أختار لروحى طريق
    و أنا اللى داخل فى الحياة مرغما
    عجبى !!

    مرغم عليك يا صبح مغصوب يا ليل
    لادخلتها برجليا و لا كانلى ميل
    شايلنى شيل دخلت أنا فى الحياة
    و بكرة ح اخرج منها شايلنى شيل
    عجبى !!

    سنوات و فايته عليا فوج بعد فوج
    واحدة خدتنى إبن و التانية زوج
    و التالتة أب خدتنى و الرابعة إيه
    إيه يعمل اللى بيحدفه موج لموج ؟
    عجبى !!

    و أنا فى الضلام.. من غير شعاع يهتكه
    أقف مكانى بخوف و لا أتركه
    و لما ييجى النور و اشوف الدروب
    أحتار زيادة .. أيهم أسلكه ؟
    عجبى !!

    نظرت فى الملكوت كتير و انشغلت
    و بكل كلمة ( ليه ؟ ) و ( عشانيه ؟ ) سألت
    اسأل سؤال .. الرد يرجع سؤال
    و اخرج و حيرتى أشد مما دخلت
    عجبى !!

    خرج ابن آدم م العدم قلت : ياه
    رجع ابن آدم للعدم قلت : ياه
    تراب بيحيا .. و حى بيصير تراب
    الأصل هو الموت والا الحياة ؟
    عجبى !!

    ضريح رخام فيه السعيد اندفن
    و حفره فيها شريد من غير كفن
    مريت عليهم .. قلت يا للعجب
    لاتنين ريحتهم فيها نفس العفن
    عجبى !!

    يا ما صادفت صحاب و ما صحبتهمش
    و كاسات خمور و شراب و ما شربتهمش
    أندم على الفرص اللى أنا سبتهم
    و الا على الفرص اللى ما سبتهمش
    عجبى !!


    و الكون ده كيف موجود من غير حدود
    و فيه عقارب ليه و تعابين و دود
    عالم مجرب فات و قال سلامات
    ده ياما فيه سؤالات من غير ردود
    عجبى !!

    غدر الزمان يا قلبى مالهوش أمان
    و حاييجى يوم تحتاج لحبة إيمان
    قلبى ارتجف و سألنى .. أأمن بإيه ؟
    أأمن بإيه محتار بقالى زمان
    عجبى !!

    يا باب أيا مقفول .. إمتى الدخول
    صبرت ياما و اللى يصبر ينول
    دقيت سنين .. و الرد يرجع لى : مين ؟
    لو كنت عارف مين أنا .. كنت أقول
    عجبى !!


    أنا شاب لكن عمرى و لا ألف عام
    وحيد و لكن بين ضلوعى زحام
    خايف و لكن خوفى منى أنا
    أخرس و لكن قلبى مليان كلام
    عجبى !!

    أحب أعيش و لو أعيش فى الغابات
    أصحى كما و لدتنى أمى و ابات
    طائر .. حيوان .. حشرة .. بشر .. بس أعيش
    محلا الحياة .. حتى فى هيئة نبات
    عجبى !!

    سهير ليالى و ياما لفيت و طفت
    و ف ليلة راجع فى الضلام قمت شفت
    الخوف .. كأنه كلب سد الطريق
    و كنت عاوز أقتله .. بس خفت
    عجبى !!

    كان فيه زمان سحلية طول فرسخين
    كهفين عيونها و خشمها بربخين
    ماتت .. لكن الرعب لم عمره مات
    مع إنه فات بدل التاريخ تاريخين
    عجبى !!

    عجبتنى كلمة من كلام الورق
    النور شرق من بين حروفها و برق
    حبيت أشيلها ف قلبى .. قالت حرام
    ده أنا كل قلب دخلت فيه اتحرق
    عجبى !!

    رقبة قزازة و قلبى فيها انحشر
    شربت كاس و اتنين و خامس عشر
    صاحبت ناس م الخمرة ترجع وحوش
    و صاحبت ناس م الخمرة ترجع بشر
    عجبى !!

    كل اللى فى الخمارة صابهم جنون
    صبحوا الرجال يتبادلوا كاس المنون
    و بدم و نبيت انكتب ع الجدار
    " يا ميت ندامة ع اللى قلبه حنون "
    عجبى !!

    قالوا الشقيق بيمص دم الشقيق
    و الناس ما هياش ناس بحق و حقيق
    قلبى رميته و جبت غيره حجر
    داب الحجر ... و رجعت قلبى رقيق
    عجبى !!

    يوم قلت آه .. سمعونى قال فسد
    ده كان جدع قلبه حديد و اتحسد
    رديت على اللايمين أنا و قلت .. آه
    لو تعرفوا معنى زئير الأسد
    عجبى !!

    بين موت و موت .. بين النيران و النيران
    ع الحبل ماشيين الشجاع و الجبان
    عجبى علادى حياة .. و يا للعجب
    إزاى أنا – يا تخين – بيقت بهلوان
    عجبى !!

    أنا قلبى كان شخشيخة أصبح جرس
    جلجلت به صحيوا الخدم و الحرس
    انا المهرج .. قمتوا ليه خفتوا ليه
    لا ف إيدى سيف و لا تحت منى فرس
    عجبى !!

    دخل الربيع يضحك لقانى حزين
    نده الربيع على إسمى لم قلت مين
    حط الربيع أزهاره جنبى و راح
    و إيش تعمل الأزهار للميتين
    عجبى !!

    مهبوش بخربوش الألم و الضياع
    قلبى و منزوع م الضلوع انتزاع
    يا مرايتى يا اللى بترسمى ضحكتى
    يا هل ترى ده وش و الا قناع
    عجبى !!

    حبيت .. لكن حب من غير حنان
    و صاحبت لكن صحبه مالهاش أمان
    رحت لحكيم و اكتر لقيت بلوتى
    إن اللى جوه القلب مش ع اللسان
    عجبى !!

    ليه يا حبيبتى ما بيننا دايما سفر
    ده البعد ذنب كبير لا يغتفر
    ليه يا حبيبتى ما بيننا دايما بحور
    أعدى بحر ألاقى غيره اتحفر
    عجبى !!

    ورا كل شباك ألف عين مفتوحين
    و انا و انتى ماشيين يا غرامى الحزين
    لو التصقنا نموت بضربة حجر
    و لو افترقنا نموت متحسرين
    عجبى !!

    نوح راح لحاله و الطوفان استمر
    مركبنا تايهة لسة مش لاقية بر
    آه م الطوفان و آهين يا بر الأمان
    إزاى تبان و الدنيا غرقانة شر
    عجبى !!

    على رجلى دم .. نظرت له ما احتملت
    على إيدى دم .. سألت : ليه ؟ لم وصلت
    على كتفى دم و حتى على راسى دم
    أنا كلى دم .. قتلت ؟ و الا اتقتلت ؟
    عجبى !!

    أنا كل يوم أسمع .. فلان عذبوه
    أسرح فى بغداد و الجزاير و اتوه
    ما اعجبش م اللى يطيق بجسمه العذاب
    و اعجب من اللى يطيق يعذب أخوه
    عجبى !!

    ينبوع و فى الحواديت أنا سمعت عنه
    إنه عجيب .. و ف الوسط لهاليب لكنه
    شقيت كما الفرسان طريقى .. لقيت
    حتى الخنازير و الكلاب شربوا منه
    عجبى !!

    يا قرص شمس مالهش قبة سما
    يا ورد من غير أرض شب و نما
    يا أى معنى جميل سمعنا عليه
    الخلق ليه عايشين حياة مؤلمة
    عجبى !!

    شاف الطبيب جرحى وصف له الأمل
    و عطانى منه مقام يا دوب ما اندمل
    مجروح جديد يا طبيب و جرحى لهيب
    و دواك فرغ منى .. و إيه العمل ؟
    عجبى !!

    أعرف عيون هى الجمال و الحسن
    و اعرف عيون تاخد القلوب بالحضن
    و عيون مخيفة و قاسية و عيون كتير
    و باحس فيهم كلهم بالحزن
    عجبى !!

    إيش تطلبى يا نفسى فوق كل ده
    حظك بيضحك و انتى متنكدة
    ردت قالت لى النفس : قول للبشر
    ما يبصوليش بعيون حزينة كده
    عجبى !!

    إقلع غماك يا تور و ارفض تلف
    إكسر تروس الساقية و اشتم و تف
    قال : بس خطوة كمان .. و خطوة كمان ..
    يا اوصل نهاية السكة يا البير يجف
    عجبى !!

    يا حزين يا قمقم تحت بحر الضياع
    حزين أنا زيك و إيه مستطاع
    الحزن ما بقالوش جلال يا جدع
    الحزن زى البرد .. زى الصداع
    عجبى !!

    فى يوم صحيت شاعر براحة وصفا
    الهم زال و الحزن راح و اختفى
    خدنى العجب و سألت روحى سؤال
    أنا مت ؟ .. والا وصلت للفلسفة ؟
    عجبى !!

    الفيسلسوف قاعد يفكر سيبوه
    لا تعملوه سلطان و لا تصلبوه
    ما تعرفوش أن الفلاسفة يا هوه
    اللى يقولوه بيرجعوا يكدبوه ؟
    عجبى !!

    على بعد مليون ميل من أرضنا
    من الفراغ الكونى بصيت أنا
    لا شفت فرق ما بين جبال أو بحور
    و لا شفت فرق ما بين عذاب أو هنا
    عجبى !!

    إنسان أيا إنسان ما أجهلك
    ما أتفهك فى الكون و ما أضألك
    شمس و قمر و سدوم و ملايين نجوم
    و فاكرها يا موهوم مخلوقه لك ؟
    عجبى !!

    - يا نجم .. نورك ليه كده بيرتجف ؟
    هو انت قنديل زيت ؟ .. أو تختلف ؟
    - أنا نجم عالى .. بس عالى قوى
    و كل ما انظر تحت اخاف انحدف
    عجبى !!

    السم لو كان فى الدوا .. منين يضر ؟
    و الموت .. و لو لعدونا .. منين يسر ؟
    حط القلم فى الحبر و اكتب كمان
    .. و العبد للشهوات .. منين هو حر ؟
    عجبى !!

    وقفت بين شطين على قنطرة
    الكدب فين و الصدق فين يا ترى
    محتار ح اموت .. الحوت خرج لى و قال
    هو الكلام يتقاس بالمسطرة ؟
    عجبى !!

    سرداب فى مستشفى الولادة طويل
    صرخات عذاب ورا كل باب و عويل
    .. و فى الطريق متزوقين البنات
    متزوقين للحب و المواويل
    عجبى !!

    الدنيا أوده كبيره للانتظار
    فيها ابن آدم زيه زى الحمار
    الهم واحد .. و الملل مشترك
    و مفيش حمار بيحاول الإنتحار
    عجبى !!

    أيوب رماه البين بكل العلل
    سبع سنين مرضان و عنده شلل
    الصبر طيب .. صبر أيوب شفاه
    بس الأكادة مات بفعل الملل
    عجبى !!

    نسمة ربيع لكن بتكوى الوشوش
    طيور جميلة بس من غير عشوش
    قلوب بتخفق .. إنما وحدها
    هى الحياة كده .. كلها فى الفاشوش
    عجبى !!

    يا طير يا عالى فى السما طظ فيك
    ما تفتكرشى ربنا مصطفيك
    برضك بتاكل دود و للطين تعود
    تمص فيه يا حلو .. و يمص فيك
    عجبى !!

    كروان جريح مضروب شعاع م القمر
    سقط من السموات فؤاده انكسر
    جريت عليه قطه عشان تبلعه
    أتاريه خيال شعراء و مالهوش أثر
    عجبى !!

    أم عبدالله
    المشرف العام
    المشرف العام

    عدد الرسائل : 136
    العمر : 30
    نقاط : 2973
    تاريخ التسجيل : 17/02/2009

    (¯`·._.·( رباعيات الاسطوره صلاح جاهين )·._.·`¯)

    مُساهمة من طرف أم عبدالله في 19/2/2009, 12:50

    يتبع ان شاء الله

    [ندعوك للتسجيل في المنتدى أو التعريف بنفسك لمعاينة هذه الصورة]

    يا عندليب ما تخافش من غنوتك
    قول شكوتك و احكى على بلوتك
    الغنوة مش ح تموتك أنما
    كتم الغنا هو اللى ح يموتك
    عجبى !!

    ياللى بتبحث عن إله تعبده
    بحث الغريق عن أى شئ ينجده
    الله جميل و عليم و رحمن و رحيم
    إحمل صفاته ... و انت راح توجده
    عجبى !!

    حقرا و فوق كوكب حقير محتقر
    فى الكون تكون دنياكو إيه يا بقر
    رملايه من صحرا ؟ .. لكين إيش تقول
    و الكون بحاله جوه عقل البشر
    عجبى !!

    ياللى فى حماه الشمس تلقى الملاذ
    و ألف بكره و بكره ... فى ضلوعه لاذ
    مين أنت ؟ مارد ؟ رب ؟ قال لأ ده بس
    انا اللى باروى القمح و اسقى الفولاذ
    عجبى !!

    غسل المسيح قدمك يا حافى القدم
    طوبى لمن كانوا عشانك خدم
    صنعت لك نعليك أنا يا أخى
    مستنى إيه .. ما تقوم تدوس العدم
    عجبى !!

    البط شال عدى الجبال و البحور
    ياما نفسى اهج ... أحج ويا الطيور
    أوصيك يا ربى لما أموت ... و النبى
    ما تودنيش الجنة ... للجنة سور
    عجبى !!

    طال انتظارى للربيع يرجع
    و الجو يدفا و الزهور تطلع
    عاد الربيع عارم عرمرم شباب
    إيه اللى خلانى ابتديت افزع ؟
    عجبى !!

    و لو انضنيت و فنيت و عمرى انفرط
    مش عاوز الجأ للحلول الوسط
    و كمان شطط و جنون مانيش عاوز
    يا مين يقول لى الصح فين و الغلط ؟
    عجبى !!

    عاد الربيع كأنه طعم الحب
    و الحب نار جوه العروق بتصب
    اتمتع ازاى بيه و انا متقطع
    من كتر خوفى لا فى الخطيئة يطب ؟
    عجبى !!

    ازاى شبابنا يقوم و ياخد دوره
    من غير صراخ يئذيه و يجرح زوره
    يا هل ترى أحسن له يقعد ساكت
    أو ينترك و لو خرج عن طوره ؟
    عجبى !!

    عينى رأت عصفور و وياه ابنه
    بيحدفه فى الريح و ياخده ف حضنه
    نوبتين و تالت نوبه – عجبى عليهم –
    كانوا سوا بيرفرفوا و يغنوا
    عجبى !!

    أحسن ما فيها العشق و المعشقة
    و شويتين الضحك و التريقة
    شفت الحياة , لفيت , لقيت الألذ
    تغييرها , و ده يعنى التعب و الشقا
    عجبى !!

    عجبى على العجب العجيب العجاب
    لما الحقيقة تطل بعد احتجاب
    و تروق و تحلا و فجأة تصبح مفيش
    كمثل طراطيش بحر ياما خد و جاب
    عجبى !!

    فى الهو ماشى يا بهلوان إش إش
    يا فراشة منقوشة على كل وش
    شقلبت عقلى و عقلى شقلبنى
    و كنت باحسبنى بقيت ما اندهش
    عجبى !!

    وقفت ساعة الصبح باغسل سنانى
    قالت لى شايف قوتى و لمعانى ؟
    إيش تطلب اليوم منى ضحكة أسد ؟
    والا ابتسامة اعلانات أمريكانى ؟
    عجبى !!

    الحلو يم اليم صابح رايح
    سارح فى حضن الميه سابح سايح
    الحلو داب فى البحر .. قلت أدوقه
    وجدت لسه البحر برضك مالح
    عجبى !!

    يا كل كلمة للعجب فى قاموس
    انسكلوبيديا لسان عرب أو لاروس
    تعالوا نجدة .. ده لسه فى عصرنا
    الشمس و البحر العريض بالفلوس
    عجبى !!

    الموج تلول تهبط و تطلع تلول
    يا بحر خدنى الشط ح اعمل به ايه
    ده ريحته طحلب مهرى و ام الخلول
    عجبى !!

    عينى رأت مخلوق فى غاية البشاعة
    أنا قلت له لما تأملته ساعة :
    اللذة و الموت علموك اللزج
    و انا علمونى الفلسفة و الشجاعة
    عجبى !!

    غطس و قب الموج نهود بمبى
    من ألف جيل جمالات ما تعلم بى
    يا قلبى عيب دول أمهاتنا القدام
    استغفر الله العظيم ربى
    عجبى !!

    علقت فى المسمار قناع مهزلة
    و معاه قناع مأساة بحزنه ابتلا
    بصيت لقيتهم يشبهوا بعضهم
    واهو ده العجب يا ولاد .. و إلا فلا
    عجبى !!

    ظهر المسيح الحى على سفح ربوة
    و نزل بهالة الضى و قعد فى قهوة
    بصوا .. تعالوا .. قالوا خليه فى حاله
    الناس فى حالهم يا بنى .. مالهمش دعوة
    عجبى !!

    لولا اختلاف الرأى يا محترم
    لولا الزلطتين ما لوقود انضرم
    و لولا فرعين ليف سوا مخاليف
    كان بيننا حبل الود كيف اتبرم ؟
    عجبى !!

    يا وردة قلبى معاكى فى الريح لعب
    لا تعبتى م الريح و لا قلبى تعب
    احنا كده : نرتاح فى صخب الجنون
    و فى السكون بنخاف قوى و نترعب
    عجبى !!

    ما انتاش بتلعب ليه يا روح بابا ؟
    و لا عسكرى و لا لص فى عصابة ؟
    إلعب أسد أو ديب رهيب أو غزال
    دى الدنيا فى نهاية المطاف غابة
    عجبى !!

    ورد ف ورق سلوفان يا حلوة ادهيلك ؟
    والا انقله بالطين فى شتلة و اجيلك ؟
    الأولانى لو وحا بحنانى
    عجبى على التانى بإيه يوحيلك ؟
    عجبى !!

    أنا قلبى كوكب و انطلق فى المدار
    حواليكى يا محبوبتى يا نور و نار
    يلف مهما يلف ما بيكتفيش
    و تمللى نصه ليل و نصه نهار
    عجبى !!

    الأرض شوك أيوه لكن هايش
    و الحمرة مش يعنى الطريق حايش
    دى دمنا السيال .. و بشرة خير
    ان انتى عايشة .. و ان أنا عايش
    عجبى !!

    إيه اللى خدته من مرور السنين
    يا قلبى الا دمعتك و الأنين
    بتئن و بتفرح و ترجع تحن
    مع إن مش كل البشر فرحانين
    عجبى !!

    اوقات افوق و يحل عنى غبايا
    و اشعر كأنى فهمت كل الخبايا
    و افتح شفايفى عشان أقول الدرر
    ما أقولش غير حبة غزل فى الصبايا
    عجبى !!

    مركب ورق من نفخة تتطوح
    ركبتها و الكل بيلوح
    سوحت فيها اتنين و خمسين سنه
    للآن .. و لا بتغرق و لا تروح
    عجبى !!

    ع الجسر فت الصبح تحت الضباب
    بين اللى لسه بينغرس و اللى طاب
    ما اهتز قلبى لنبت طالع جديد
    قد اللى ماشى .. و تحت باطه الكتاب
    عجبى !!

    يا خالق الكون بالحساب و الجبر
    و خالقنى ماشى بلختيار و الجبر
    كل اللى حيلتى زمزمية أمل
    و ازاى تكفينى لباب القبر ؟
    عجبى !!

    قاعدة قنانى الخمر ساكتة و ساهية
    مع ابن آدم فى الشبه متناهية
    مفيش كده روقان فى لحظة تشوفهم
    و بعدها بلحظة يودوا ف داهية
    عجبى !!

    حتة محارة وجدتها فى يوم لقية
    قالت لى شوف كيف الطبيعة شقية ؟
    نظرت للكهف اللى فيها و لقيت
    إن الطبيعة كمان .. لا أخلاقية
    عجبى !!

    بلياتشو قال إيه بس فايدة فنونى ؟
    و تلات وقق مساحيق بيلونونى
    و الطبل و الزمامير و كتر الجعير
    إذا كان جنون زبونى زاد عن جنونى
    عجبى !!

    نقطة مرارة كمان على مشروبى
    دوبها يا ساقى حسب مطلوبى
    طعم الحياة .. مش برضه فيها و فيها ؟
    ليالى وردى و نهارات خروبى ؟
    عجبى !!

    وسط الحطام اتفرجوا يا أنام
    تمثال ملك .. و مبولة م الرخام
    اتنين نحتهم نفس أسطى الحجر
    و كانوا ذات يوم كتلتين لسه خام
    عجبى !!

    عيد .. و العيال اتنططوا ع القبور
    لعبوا استغماية .. و لعبوا بابور
    وباللونات .. و نايلونات شفتشى
    و الحزن ح يروح فين جنب السرور
    عجبى !!

    أنا قلبى كورة .. و الفراودة أكم
    ياما اتنطح و انشاط .. و ياما اتعكم
    و اقول له كله ح ينتهى فى المعاد
    يقول بساعتك ؟ والا ساعة الحكم ؟
    عجبى !!

    الضحك قال يا سم ع التكشير
    أمشير و طوبة و انا ربيعى بشير
    مطرح ما باظهر بانتصر ع العدم
    انشالله أكون رسماية بالطباشير
    عجبى !!

    أهوى الهوى و همس الهوى فى العيون
    و بسمة المغرم .. و دمعه الحنون
    و زلزلات الحب نهد الصبا
    أكون أنا المحبوب .. أو لا أكون
    عجبى !!

    يا ملونين البيض فى شم النسيم
    لون الحنين و الشوق و خمر النديم
    ما تعرفوش سايق عليكوا النبى
    تلونوا الأيام بلون النعيم ؟
    عجبى !!

    الدنيا صندوق دنيا .. دور بعد دور
    الدكة هى .. و هى كل الديكور
    يمشى اللى شاف .. و يسيب لغيره مكان
    كان عربجى أو كان امبراطور
    عجبى !!

    قطى العزيز راقد على الكنبات
    فى نوم لذيذ .. و بيلحس الشنبات
    و انا كل عين فنجان مدلدق قلق
    صدق اللى قال إن الحياة منابات
    عجبى !!

    قالوا السياسة مهلكة بشكا عام
    و بحورها يا بنى خشنة مش ريش نعام
    غوص فيها تلقى الغرقانين كلهم
    شايلين غنايم .. و الخفيف اللى عام
    عجبى !!

    سلام سلام .. سلام سلام .. سلام
    كلام كلام .. كلام كلام .. كلام
    هز الورق يا صاحبى كدهوه
    يطلع كلام سلام .. و سلام كلام
    عجبى !!

    فوق تحت .. ورا قدام .. يمين شمال
    فى الجو .. تحت المية .. أو فى الرمال
    طلب الكمال يحرم على الممكن
    و الممكنات دول محرومين م الكمال
    عجبى !!

    هات يا زمان .. و هات كمان يا زمان
    غير بسمة الشجعان مامنى يبان
    هو اللى داق الفرحة يوم ثورته
    يقدر يعود و لا ثانية للأحزان ؟
    عجبى !!

    يومى على الله تنتهى و تغيب
    الشمس .. و تعود تانى يوم لهاليب
    زى الحياة .. مأساه .. و من كترها
    بقى لا انتهاءها و ابتداءها عجيب
    عجبى !!

    علم اللوع اضخم كتاب فى الأرض
    بس اللى يغلط فيه يجيبه الأرض
    أما الصراحة فأمرها ساهل
    لكن لا تجلب مال و لا تصون عرض
    عجبى !!

    أنا كانلى أب .. و كان رئيس محكمة
    ستين سنة .. فى قضية واحدة اترمى
    ستين سنة .. و طلع براءة و خرج
    يشكى الحياة و الموت لرب السما
    عجبى !!

    قالوا ابن آدم روح و بدنه كفن
    قالوا لأ بدن .. قالوا ل أده روح فى بدن
    رفرف فؤادى مع الرايات فى الهوا
    أنا قلت لأ روح فى بدن فى وطن
    عجبى !!

      الوقت/التاريخ الآن هو 6/12/2016, 16:03